|
|
|
اكبر شموخ مطير من روس الجبال الشامخات |
حييت ياراس الأميـر ابن الأميـر ابن الأميـر
فيصل ولد بندر ولد فيـصل زبون الكـايدات
نعم الفعايل يادويش مطير يا الأسم الكبير
أسم على الدنيا رسى مثل الجبال الراسيات
يا راعي الأسم الكبير وراعي الفعل الكبير
والله ونعم المنجــزه ياحي بعض المنجــزات
يا راعي الأسم الكبير وراعي الفعل الشهير
مثلك ياخو جوزاء ومن شارك بالأريا الطيبات
ولا هي غريبه من مطيـر ومن تقدم عن مطيـر
قبل المزاين ثابته الن الثـلاث المعجزات
في ليل والا في طلوع الشـمس والا في عصير
اخوان جوزاء شيوخنا نور الليال المظلمات
واليومه مزاين عطايا الله يشوق الها النظير
ياطيب جرعات الحنين ان راحت الدنيا وجات
الله ذكــرها في كتابه عـالم غيب الظميــر
مذكورةٍ فالغاشــيه بين الصور المنــزلات
لازم انلدّاله النظر ونشـوفها بامر القدير
جل جـلاله باعــث الأرواح من بعد الممــات
البل ياهل البـل هيبه للغنـاوي والفقيـر
البل سـمحات الوجيه اصفاتها خيـر الصفـات
البـل نشـبعها ونشـبع في طرفها كل طيــر
مطير تشـبع دونها حـدب النســور الحايمات
نرعى بها يوم ان زاد جـدودنا تمر ومظير
ومعلقٍ بخـروجها جــرد السـيوف المرهفـات
تمشي من الحره الى بطن الكويت احلى مسير
هذي منازلها الحديثـه والسـنين الماضيات
وان ربّع الصمان واثمر والفحل جاء له هدير
هذي طرات العمر في الدنيا واكيد احسن طرات
الله يجيب الها المطير يالين مشــربها غدير
تشـرب من الصمـان ماهو من بطون الوايتـات
دار تفليبه اليـا من الهواء جـاله صفيـر
غنـات روح ما بعدها فالحيــاة ولا غنــات
مرتاح راعيها يشــاور فالخيال ويسـتشــير
يوم يتوسـد من تحت راســه عضود المرزمات
والرب ناصـر بطيب افعــالنا ونعم النصيـر
الرمـز حمـــران النواظـر بالفعـول الأولات
من طبعنا حنا ما نرضى بالخطاء مهما يصير
الا لمن زل الحـدود ولا تفيــد مفاهمــات
ان شـامسـت ثم هـزعـت بارقابها مها نغيـر
قدامـها لعيونها نخلـي الـدروب مبرحــات
من دونها القاسي يلين ويبرق السيف الشطير
ياما دحمنا من القبايل من سـباعٍ ضاريـات
دقلات علوى في الملاقا تشبه البحر الغزير
وبريه وصف رجالهم مثل الأسـود الكاســرات
وارجـال عبدالله هل الـردات لن شـبت سـعير
نعم الحسب نعم النسب نعم اليدين الطايلات
قومٍ مسـميهم رســول الله بالأســم المنيــر
من يكشـف التاريخ يلقى وسطه العلم الثبات
لاشـك تجمعنا مطير اسم الكبير مع الصغير
وليا طرقت المدح فيهم قلت اخذ عني وهـات
النا الفخر واطيب فخر ما نمد بالباع القصير
حنا جبـال ما تزعــزعها الريــاح العاتيـات
الأوله النا رجال العشـــر فاليوم الخطيـر
والثانيه النا طرحنا من ســمانا الطايرات
والثالثه لنا نثبتها اليا قــر القريــر
خيال عن تسـعين فارس في ظهور المســرجات
في مدح ربعي تاج راسـي قادني سـلك الحـرير
واللي علينا قد حــلف راحت نســاه مطلقــات
واليا اعتزينا نطحن اللي قدمنا طحن الشعير
واليا نوينــا ما نوينا ما تهنا بالمبــات
ما قلت عنهم غير شــي مختصــر ما هو كثــر
اكبر شـموخ مطير من روس الجبال الشــامخـات
واليوم كلن ما عليــه خـلاف بالحــال السـتير
طعنـا ولاة الأمـر والرحمـن يامــر بالــولاة
الشــاعر :عطــالله بن باخــت الهجله